من أنا

موضوع: من أنا الأربعاء فبراير 02, 2011 10:38 am

تـــحــــيــــاتــــي لــلــــجـــمـــيــــع

يومكم ســـــعيد يا أحلى أعضاء بالمنتدى

بهادا الموضوع رح عرفكن على حالي بالتفصيل و بتمنى من الكل يشارك فيه و يعرفنا على حاله بالتفصيل

مشان نصير بنعرف بعضنا أكتر و تقوى العلاقة بين الأعضاء و نشيل الرسميات تبع أخ كذا و الخ . . . .

بنصير بنشكر و نسمي بعضنا بأسمائنا هيك أحلى و أفضل

مثلاً : هللا كلمة مشكور أخ Memo mk أو كلمة مشكور يا أحلى معن

شو الأفضل ؟ أنا بنظري لمّا بناديه بإسمه بكون أفضل

بالنهاية هادا مجرد اقتراح بسيط منّي فيكن تنفذوه و فيكن ما تنفذوه لأنه كل شخص فيكن إله أفضلياته

و رح إبدا أنا بالتعريف عن حالي

مين أنا ؟ أنا The Emperor ABH DJ

شو يعني هالحكي ؟

The Emperor يعني الامبراطور هادا لقب بحبو من زمان كتير و اسم المحل اللي بدي إفتحه تبع صيانة Mobile & PC

ABH يعني إسمي الثلاثي أحمد بسام حسن A أحمد & B بسام & H حسن

DJ أكيد كلكن بتعرفوا شو يعني DJ مو هيك منسق أغاني و ريميكسات لأنه هي من هواياتي

أنا من مواليد دمشق 27 / 8 / 1992 هي بس مكان ولادتي و تاريخها

أنا بالأصل ماني من الشام أنا أصلي من طرطوس بانياس المرانة أكيد ما حدا سمعان فيها

أو من مصياف حيالين ( حيالين ) هي ضيعة أمي و بصراحة أنا بعرفها أكتر من المرانة

و بالنسبة لشكلي أكيد كلكن بتعرفوني كشكل لأني ماشالله كل يوم بصورة

لمعلوماتكم أنا كل كم يوم بغير صورتي مو إعجاباً بحالي بس لأني متقلب كتير

كل ما إعتمدت على صورة و حسيتها مناسبة تاني يوم بطّلع فيها بحسها مانها مناسبة مدري ليش

بس خلص انشالله رح إثبت على اللي حاططها حالياً مع إنها قديمة شوي

و بالنسبة للإشارة اللي عند صورتي بتوقيعي أو صورتي الشخصية هي تبع إشارة البوصلة و بالنص ABH

هي بتعني إنه ABH حول العالم شمال و جنوب و غرب و شرق لأنه في عندي هيك طموح

بالنسبة لشغلي أنا والله ماني عم بشتغل شي و لا عم إدرس

لإني خلصت البكلوريا و ما طلعلي شي على علاماتي و أنا آخر شي بفكر فيه إني عيد البكلوريا

المهم أنا هللا عم فكر إفتح محل لصيانة الكمبيوتر و الموبايل و للتصوير و المونتاج و كل شي بخص الكمبيوتر

يعني الحمد لله معلوماتنا كويسي بهالمجالات ( يعني في شي بعوض عن فشلي بالبكلوريا )

ماشي كانوا أهلي عدموني على هالعلامات و جبروني على الإعادة

من أنا 931377

أنا صفاتي بشكل عام :

خجول ما بعرف شو السبب بس عند الجد الجد بعجبكم

عنيد كتير يعني ما حدا بيقنعني بشي ماني مقتنع فيه

متواضع زيادة عن اللزوم مع إنه صفة التواضع حلوة بس عندي زادت عن الحد و أنا بكره هالشغلي فيني

قلبي طيب كتير كمان كتير بكره هالشغلي فيني لأني فوراً بحن

دقيق كتير يعني لمّا بحاكي حدا وجهاً لوجه بقدر أعرف هوي شو بدو بدون ما يحكي ( هي لغة الجسد )

يعني قليلين اللي بيقدروا يكذبو عليي

و هي صفاتي بشكل عام تقريباً

و هواياتي هيي التصوير بالدرجة الأولى و كل شي بيتعلق بالكمبيوتر بالدرجة التانيي و في السباحة و الخ . . .

الموسيقا اللي بحب إسمعها أكيد و بدون أي تفكير موسيقا العازف العالمي ياني

و من الأغاني في كتييير متل أيمن زبيب و مروان خوري و نجوى كرم و فارس كرم و كم أغنية لنانسي و أليسا و الخ . .

بس بفضل واحد أكتر من كل اللي ذكرتهم هوي بو علي عادل خضور الملك أكيد قلال اللي بيعرفوه منكم

هيك أنا تقريباً حكيتلكم كل شي عن حالي

.
.
.
.
.
.
.
.

لا لا بس شوي نسيت إكتب شو بحب من الأكلات

عم إمزح ولووووووووووو

عقولة أسعد خرشوف شبكن شبكن عم لطف جاااااااوووو

المهم بالنهاية أنا بتمنى ما تاخدوا هالموضوع هيك رفع عتب عاملوه و لو بشوية جدية

مع كامل تحياتي

The Emperor ABH DJ
حــــــــــــــ أحـــــمــــــد ـــــــــــــــن